صدای آذربایجان=آذربایجانین سسی

سیاسی و اجتماعی(در مورد آذربایجان)

آخیر چرشنبه مراسم لری

 

                                آخیر چرشنبه مراسم لری

 

آتیل-باتیل مراسمی

نوروز بایرامیله ایلگیلی و اونا حاضیر لیق علامتی اولان آخیر چرشنبه گونو مراسم لریندن بیری ده هامان چارشنبه گونونون سحر چاغی تورا – ووردان اجرا اولونان "آتیل –باتیل " مراسمی دیر.

بو مراسم داها چوخ قادینلار قیزلار طرفیندن اجرا اولونور. ایلین سون چر شنبه سی گونو سحر تورا –ووردان قادینلار، خصوصیله یئتیشمیش و بخت عرفه سینده اولان قیزلار ،آلدیقلاری تازا ساخسی کوزه لرله ،منسه ،یاریم سهنگو ... ایله گتیرمک اوچون چشمه باشینا گئدر ،اؤزلریله آزاجیق یاشیل لاشمیش بوغدا ، قایچی ،سورمه وآینا آپارار،اورادا آینایا و یا سویا باخیب، گوزلرینه سورمه چکر ،دیرناقلارینی توتار ، ساچلارینی دارار ،گؤیلری قایچی ایله سویا دوغرار و بو ایشلری قورتاردیقدان سونرا سو آرخینی اوتای –بوتایا هوپپاناراق دئیرلر:

                    آتیل -باتیل  چرشنبه،

                   بختیم آچیل چرشنبه،

                 سویون باشی بیزیمدیر،

                چاخماق داشی سیزین دیر....

همین سحر تورا –ووردان چشمه لر باشی ائله شلوغ اولارکی ، ایگنه سالماغا یئر اولماز و محله نین تقریبأ بوتون قیز و قادینلاری چشمه باشیندا اولارلار.

 

جیدیر

آخر چرشنبه گونو سحر تئزدن ، هاوا ایشیقلانیب ، گون چیخماغا بیر قدر قالاندا کندلر و قصبه لرین معین میدان کنارلاریندا گنجلر آت چاپار و یاریش کئچیردر لر ،کند ویا قصبه نین اهالیسینین اکثری بو میدانین اطرافیندا توپلانار و یاریشا  تاماشا ائدیب ، اونو آلقیشلایار – " آتیل –باتیل " لارینی قورتاریب ، تازا منسه لرده ائولرینه سرین وتمیز ایچمه لی سو گتیرن گنج قیزلارین دا هامیسی ،گؤزلری سورمه لنمیش حالدا ،بو بو یاریش میدانینا گلر ، قادینلار و قیزلارا مخصوص اولان یئرده دایاراناق،آت چاپان گنجلره تاماشا ائدرلر . جیدیر مراسمی نوروز بایرامیله ایلگیلی توتولماسادا، مختلف تورک خلقلری داخلینده ، او جمله ده  تورکمنلر داخلینده  ان قدیم دؤرلردن چوخ یاییلمیش  بیر ایدمان و اگلنجه دیر.

 

آخیر چرشنبه و یئددی له وین

بوتون آذربایجان  کندلری و شهرلرینده آخر جهارشنبه گونونون قاباق گئجه سی پیلوو پیشیریب ، شنلیک ائرلر ،سون چرشنبه گونو ایسه کیچیک منطقه لرین مرکزلرینده بؤیوک و طنطنه لی بازار اولار  وبوتون کندلی  کیشیلر  تازا پالتارلارینی  گئیمیش اؤز اوغلان و قیز  اوشاقلاری ایله یئددی له وین ویا چرشنبه یئمیشی ، اویونجاق و سایره آلماق اوچون  بو بازارا گلر ، ناهارا قدر بورادا گزیب ، دولانارلار . آخر چارشنبه بازاری  اولدوقجا طنطنه لی  و شولوق اولار . بازاردا بولوجا "یئدی لوین " ویا "چرشنبه یئمیشی "   ساتارلار . یئددی لوین یئددی  چئشید قورو مئیوه نین  قاریشیغیندان  عبارت اولان  مئیوه مجموعونا دئیرلر. معمولا هامی: هم شهر ،هم ده کند اها لیسی ،هر کس عایله سینین سایی له علا قه دار ، معین مقدار یئددی لوین آلیب ، آپارار و اونو نوروز بایرامینین قاباق گئجه سی عایله عضولری ، خصوصیله اوشاقلار آراسیندا پایلایار و معین مقدارینی دا  نوروز بایرامی  گونو  گؤروشه  گلنلر اوچون  دوزلمیش بایرام  سوفره سینه قویارلار.

+ نوشته شده در  سه شنبه 1386/12/28ساعت 1:36 PM  توسط احد (اوغلو)  |